Jolas bilduma hau Euskal Girotze Barnetegietan eratu eta probatutakoa da. Bertan antolatzen diren egonaldien helburua ondo pasatu eta euskararen erabileran eragitea da, euskararen aldeko jarrerak sortu eta bultzatzea, erabiltzeko gogoa piztu eta indartzea.

Zentro horietan Euskal Autonomia Erkidegoko ikastetxeetako 8-14 urte bitarteko ikasleak izaten dira, gela osoak, eta 25 ikasle ingurukoak.

Jolasen ezaugarriak:

• Adina: 8-14 urtekoentzat pentsatutako jolasak izan arren, besteentzat ere balio dezakete.
• Iraupena: Azaltzen den denbora gutxi gorabeherakoa da. Antolaketa eta jolasaren bilakaera kontuan izanik, luzatu edo laburtu daiteke. Ekintza luzeak hainbat saiotan egitea gomendatzen da.
• Partaide kopurua: Ekintzak 25 neska-mutil inguruko taldeentzat prestatuta daude. Beste kopuru batzuetarako ere egokiak izan daitezke.
  • Talde handia: 25 neska-mutil.
  • Talde handia azpimultzoetan: 25 neska-mutikoak 3-4-5 taldetan banatuta, guztiak batera eta jolas berean arituz.
  • Talde txikia: 5-10 neska-mutil. 
• Monitoreak: Ekintza nolakoa den ezagututa, monitoreen jokabide egokiena zein izan daitekeen jartzen du, aholku modura.
• Hizkuntza lanketa: Agertzen diren ekintzetan hizkuntzaren trataera ezberdina da. Hori dela eta lau atal bereizten dira:
  • Ezagutza: Euskararen arlo zehatzen bat lantzeko balio dute. Alboan jarrita dago zer landu daitekeen bakoitzean.
  • Motibazioa: Helburuei buruzko hausnarketa bideratu eta gogoa pizten laguntzeko jolasak dira.
  • Erabilera trinkoa: Ekintza hauetan erabilera handia da, eta gehienetan bideratuta daude (gidoiak ikasi, azalpenak eman...).
  • Erabilera orokorra: Ez dute hizkuntza lanketa zehatzik, jolasaren araberako erabilera baino ez da.